自从金融海啸席卷全球后，唔少铺头都“做唔住”，相继执笠；打工仔一样死，各大机构逐间裁员，失业率急升，总之就惨情喇。至于足球圈，都不能幸免啰，欧洲各地球会都爆发经济危机，其中西班牙球会更危机四伏，话唔定引发一轮破产潮！

负债累累 西乙高危

　　波男唔系唯恐天下不乱，但西班牙传媒最近公布西班牙球会负债数量，的确非常惊人。据悉现时西班牙球会合共负债达三十亿欧元（约三百亿港元），西班牙足球联赛副主席泰巴斯更用“极度担心”形容现时情况，皆因球会负债兼遇上金融海啸，佢担心有好多球会顶唔住，最终要破产收场。

　　危机四伏当然唔系一线球会，而系好似西乙呢类次级球会，好似皇家苏斯达、切尔达及利云特，本身已经负债累累，经济衰退之下，今年唔少机构又唔肯赞助球队，令球会收入大受影响；另外亦缺乏电视广告收入，加上观众又勒住荷包，入场人数大幅削减，令球会难以生存。再者，球员薪酬近年水涨船高，球会经营的确非常吃力。

　　波男系西班牙波拥趸，特别系皇马，想当年何等辉煌，施丹、碧咸、费高、朗拿度、鲁尔、卡路士组成“银河舰队”，每个月出粮都唔知要几多“茄殊”至埋到单，但波又真系好好睇。点知依家就折堕咯，“云佬”长抖，只系揾个就雪僵基斯普顶替，真系今非昔比。

　　如果西班牙球会唔掂话，欧洲四大联赛就只系剩番英格兰顶住，但海啸唔知几时至退，散埋都唔出奇！